1
2
3
4
5
6
7
8
9
10
11
12
13
14
15
16
17
18
19
20
21
伊初相會的暗暝，是佇阮兜附近的彼擔滷味。總是感覺，伊真面熟，我兩蕊目睭自按呢掠伊金金相，想袂到煞和伊雙眼對著。
阮兩人相對看，我肉文笑，應該表現甲真大範，無予發現是咧共伊偷看。
伊也真有禮貌，用一个淺淺的笑容回應我。這个人看起來好親像真笑面，咧和頭家講話的時真活潑，毋過咧挾滷味的時，看起來煞戇神戇神，毋知咧想啥。
—-
尹清文彼暗並無想起佇佗位見過廖勳翔，另日閣佇前女友的喪禮，伊才想起，著齁，伊是海草後來交的男朋友，也是未婚夫。

---

「文的，你敢有愛我？」無論佗一任女朋友，攏按呢共伊問過。
這陣，絕對袂使激恬恬。毋過也袂用得傷緊就應--伊。一定愛相準時間，用這世人上深情的聲嗽講：「有啊，我也愛你。」
清文感覺真龜怪，敢講查某人無聽過華語講的：愛在心中口難開的感覺？
敢講無聽過〈愛情限時批〉唱講：欲按怎對你講出心內話，想了規暝，較想嘛歹勢。
查某人攏袂歹勢，遮簡單就共「愛你」提出來餾，敢攏袂感覺這句話變甲誠落價？

--
「哪會，愛我講幾改，我攏願意。我愛你啊。」勳翔對芳如講，「我感覺逐擺我對你講這句『我愛你』，我就愈來愈愛你。」

「拜託，你莫遐八珍，我聽--著攏感覺起雞母皮！」芳如按呢回應，聽起來親像講耍笑，實際上，伊是真正激一个無爽快的表情。而且芳如彼支喙無欲放勳翔煞，閣繼續講：
「恁查埔人若對女性講『愛你』，一定攏是有目的。毋是做啥物虧心事，就是數想查某人的身體，我看現現啦！恁查埔人就是父權，講啥物我愛你，攏是假影的，尤其對你的喙講出來，我感覺這份愛變甲真俗價啦。」

勳翔應該愛感覺受傷，毋過長期以來，伊已經習慣芳如對伊的冷淡和情緒暴力。嗯，殘忍的代誌毋但按呢。但是勳翔一直吞忍，一直講「我愛你」，因為伊相信，一直表達愛意，有一日，芳如一定感受會著。