Plurk paste

！！！！！！エラー！！！！！！

某暴走MV衍生創作
全員向/PDP/微惡搞3F3
人物地點劇情對白如有雷同，實屬巧合

！！！！！！エラー！！！！！！



試行錯誤


【序幕】


這是一個愛與自由的青春熱血故事。

故事發生在亞洲某座尋覓真自由的國際城市。

某個風和日麗的中午午，一群即將驚天地泣鬼神的暴走族於北區悄然誕生。身穿以紅線繡上標語的米白色特攻服，梳起一頭油亮的最潮髮型，一行四人浩浩蕩蕩地集結河旁，鄭重地向世界宣告，404暴走團正式結成。

成員包括——
香城喬奶榜兩屆榜首兼團長肥boy！
環保素食主義推廣搞笑大師Po K！
東瀛不死鳥第N代傳人忍者D Gor！
身高第一帥比大衛宇宙潮人33！

或許世人會誤以為這群暴走族是青梅竹馬自小穿着同一條內褲長大的兄弟。事實卻是，他們是長大之後才被逼穿上同一條褲，並肩嘗百蟲闖鬼域飛峽谷，經歷大小風雨才走到今時今日的戰友。

他們四人，便是這部青春喜劇的主角。




【第一幕】— Metallic Heart


自團隊結成後，由於某團員投資失利，缺乏團費的他們買不起電單車。然而為了貫徹暴走族之名，他們開始每天在河堤聚集流連，時而騰雲駕霧醉生夢死，時而彈彈斑鳩打打雞蛋，找些樂趣過日子。

「肥boy，介紹啲好野你歎下，睇下呢條女幾咁正。」33舉起中指推了推有色眼鏡，翻開最新入手的東瀛雜誌。

「多謝3哥！如果唔係靠你share啲東瀛女優嘅最新資訊，我都保唔住喬奶榜主之位，肯定晨早就畀人踢咗落嚟喇。」聰明的肥boy一早搶佔石級有利位置，剛好夠高與半蹲的33勾肩搭背，毫不費勁便盡覽書中美人。

「客氣喇，好野梗係要同兄弟們分享嘛。」33頓了頓，忽然想起一件事：「話時話，D Gor同Po K呢，唔見佢哋嘅？」

「Po K話肚餓，D Gor陪佢去買便當。」

「吓，我都肚餓喎，叫佢哋買埋我個份先。」

33把雜誌遞給肥boy，正要從褲袋深處掏出手機，身後已傳來D Gor的聲音。

「你份午餐係度，接住喇。」

接住D Gor投出的高速直球，33定眼一看發現原來是飯糰，而且是沒有餡料的純飯糰！

「唔係掛，紫菜包飯，連粒梅都冇？點解佢嗰盒有菜有豆又有牛油果，我就只係得白飯㗎！」

「有飯你食已經好好喇，沙律咁鬼貴，我哋budget又有限，將就下啦。」埋首美女堆的團長答道。

「想食肉自己買啦X街，唔講喇，餓X死我。」Po K坐到石級，揭開盒蓋極速快吞轟。

「唉，個天好唔公平啊！幾時我哋先至可以賺多啲錢啊！」33仰天一歎。

D Gor拍了拍33肩膀，順勢坐在Po K身旁，說：「遲下等我哋大鬧一場，到時出咗名成為天團，頂級和牛拖羅壽司自然不在話下，仲有錢買幾部電單車，配合返我哋暴走族個名。」

「望係咁望啦。喂等陣先D Gor，點解你有和風燒牛肉飯糰食？」

「我自己出錢買嘅。」

「你唔係投資失敗咩，哪來嘅錢？」

「唉，3哥你仲問？佢肯定又係偷用變身術，變身美女呃飯食啦。」肥boy繼續翻到下一頁，一邊欣賞婀娜多姿的美女圖，一邊插嘴。

D Gor配合地單起眼一眨，嬌滴滴地說「行きます！」，害33打了個冷顫。

「噁……當我拜託你，好心唔好用呢個樣扮可愛……」

三分鐘後，Po K遽然震怒大叫：「X你！仲乜偷我啲牛油果啊！」

左手食指與姆指夾着果肉，嘴裹含着半片牛油果的D Gor挑釁地望着Po K。

「你自己都已經有牛肉飯糰食，仲要偷我啲沙律，你冇良心㗎！」

「點啊，係咪唔畀得我食先。」

「就係唔畀，唔得啊！」

「嚟啊，打過啊！」

「你估我唔敢啊！」Po K氣憤地把便當盒摔在地上，作勢起身。說時遲那時快，敏捷的忍者D已拔腳逃走。

「係男人你就停係度畀我打！」Po K指着D Gor，緊追其後。

「追到我你咪打囉！」

「夠薑就唔好走啊——」

波光粼粼的水面映照出兩道白色身影，特攻服的外套衣擺在小白菊盛開的綠草叢中飄揚。終於，肥boy的目光從書頁間移開，凝望河旁追逐的兩名花樣男子，留下一句評語。

「真係青春啊。」

「真係發神經先真。」




【第二幕】 — Adrenalin


暴走族是一種身份，也是一種生活方式。

青春與熱血，沒有想像力絕對不能成事。沒有電單車不能叫暴走族？不要緊，反正都是車，以火車替代又有何不可。

——轟隆轟隆、轟隆轟隆、轟隆轟隆——

「聽住，」男人緊貼彼此的額頭，Po K幾乎能夠從D Gor的眼瞳中看見自己的倒影。對方強而有力的手掌按着自己的後頸，從掌心傳來的不只是熾熱的溫度，更是真摰的信任，是無限的支持。

「你要相信自己係得嘅，你一定可以做到。唔好理外面啲人講乜，你要相信自己！我哋信你可以闖過呢次難關㗎！」

「我會做到！我要證明畀大家睇我會成為更好嘅人！」Po K咬緊牙關，使力點頭，眼中再無迷茫。

聽到Po K堅定的回應，D Gor終於展顏。明明他長得三尖八角，笑起來時眼睛瞇成一條線，眼袋又大，與帥氣相差十萬九千里，可是Po K看着看着，竟覺得他有些可愛。

「喂醒下啦！」D Gor低聲一呼吳令Po K回過神來，腦海中想着的人就站在眼前不足四厘米的距離內，任誰都難免耳根一紅。

「Sor啊，啱…啱啱諗緊啲野。」

「唔好諗咁多喇，行動最實際，郁手啦。」D Gor捏了捏Po K的脖子作最後的鼓勵。

——轟隆轟隆、轟隆轟隆、轟隆轟隆——

「就係咁，盛載住夢想嘅列車，喺鐵道上朝住終點奔馳。雖然唔知道終點喺邊，但只要呢條路持續落去，我哋呢架列車就永遠都唔會停……停停停停止……」

地面忽然傳來一段旁白，Po K和D Gor同時低頭，只見一台復古便攜式立體揚聲器憑空出現在他們腳邊。

「幾搞笑喎，部機你放係度㗎？」Po K問。

「唔係我啊……」一陣寒氣吹過，D Gor聽不住抖了一下。

「喂唔係喎，呢度咁近層場，唔通係鬧鬼……啊。」哪壺不開提哪壺的Po K被D Gor無情地拍了一掌。

「講咁多做乜，嗱嗱聲搞掂佢走人啦。」揚聲器繼續發出斷斷續續的讀白，轉眼間，D Gor已不着痕跡地縮到Po K身後。

「D Gor唔使驚，我我…我可以保護你，」

「點睇你同我都係一X樣咁驚啦！」

「你兩個馬鹿野郎！！」

二人被洪亮的怒吼嚇一跳，四處張望之下才注意到站在大水管下方朝他們舉中指的肥boy。

「你哋仲要搞幾耐啊，搬個雪櫃返去啫，搞到好似要試跳第三次笨豬jump咁，煽晒情做乜X呢？」

「X你，原來係你兩個，想嚇X死我哋咩。」

「我哋就嚟餵飽晒呢度啲蚊喇，大爺快脆啦好嗎。」

「搬，我實搬。」Po K回敬了一句粗口，便捲起衣袖，着手搬移被人棄置在水管石墩上的雪櫃。可是雪櫃不過移動了半呎，他已滿頭大汗，氣喘地說：「喂真係唔得啊大佬，真係好鬼重啊。」

「你得㗎，呢部雪櫃得你先搬得走㗎。」

「加油啊Po K，不過睇嚟冇返幾個鐘你都搬唔完，我哋會去餐廳坐低慢慢食住等你㗎。」

吸啜着可樂味珍寶珠的33拍去黏在褲管上的碎石泥巴，走到肥boy身邊牽起他的手，十指緊扣，含情默默地說：「My love，來，等咗咁耐你一定餓壞，等3哥帶你去食三哥。」

「好啊！我由今朝9點等呢兩條Ｘ街等到下畫5點，太陽都就落山，乜都冇食過，心入面一直想食三哥，我今日嘅夢想終於能夠達成了！Yeah！」肥boy兩臂一伸，仰天高呼萬歲。

「我哋依家就去食三哥！」33堅定地對天發誓「今天食唔到三哥絕對唔返屋企，Follow me！」

「食餐飯啫，佢兩個黐咗邊條線？」目送團內兄弟為一碗米線手牽手向著夕陽奔跑的背影，D Gor感到一頭冒水。

「God knows...」Po K使勁推啊推，雪櫃終於緩緩地又再移前一吋。




【第三幕】— Overheat


如果有人問，男人的友誼最重要是甚麼？他們會說，是你追我逐的互動，更是能吻下去的勇氣。

那麼，請問那場激吻是誤會嗎？還是故意為之？D Gor說，這一切都是酒精惹的禍。

那天，他們的確都喝茫了。

不知道是誰從哪裹找來一噸啤酒塞滿了D Gor家大廳廚房廁所睡房，為了幫忙解決堆積如山的酒，他們早上喝，晚上喝，隔天早上接着再喝，只差那麼一點點，就要酒精中毒榮歸天國。

到底是誰先提起接吻的話題，四人都記不清楚。說到某一刻，D Gor憤而推開33，蹣跚地往前晃了幾步，好不容易才站穩，仰頭又灌下半罐。Po K迷迷糊糊地隨接着D Gor的步伐走，看見他用力扔掉啤酒罐，他也摔了。

「望住我做乜啊，有野想講說講啦。」

面對D Gor，Po K卻甚麼都沒有說，挺起胸口便往D Gor身上一撞。

那一剎，D Gor腦海中其實也沒有想甚麼，只是Po K那雙沾了啤酒的水潤嘴唇在眼前晃來晃去，看着就覺得心頭悶悶的。打從相識起，他是很照顧Po K，甚至有些超出了兄弟間的情誼，這點他心裹一直清楚。結果在酒精催化下，身體擅自行動起來，回過神時便已吻下去。

輕輕吻過一遍，心豁出去了，誰又料到Po K不但沒有抗拒，還主動回擊，之後事情便一發不可收拾。輕吻、連環吻、法式舌吻……看得肥boy及33目瞪口呆，除了下巴掉到地上連聲驚呼外，再也給不出別的反應。

就在肥boy和33以為他們要激吻直至世界盡頭時，二人緊貼的身軀終於分開。片刻喘息，Po K開口只說了一句話：

「あなただけ見つめてる（我只凝望你）」

D Gor心領神會，不知從哪裹變出一顆籃球，緊接以東瀛名曲回應Po K的心意。

「君が好きだと 叫びたい！（好想大聲說喜歡你）」

究竟他倆是愛了才吻，還是吻後愛上？通通都不重要。最重要的是原來有時候，愛情來得如此突然。

33、肥boy抱腹大笑，對望一眼，團長臉上掛着驚喜神情，興奮地說：「估唔到我哋係成名之前就迎來第一對團內couple，實在可喜可賀！暴走check list上又可以劃走一項喇！」

「吸煙、飲酒、團內衝突、大叫、夕陽奔跑、兄弟情、愛情、勁歌熱舞……我哋已經完成咗咁多樣，仲有三項就可以全制霸！加油啊D Gor、Po K，靠晒你哋喇！」

然而二人已經進入忘我狀態，陶醉於自己美妙的歌聲中，甚麼都聽不進耳朵裹。




【第四幕】— Woh! Clash!


「肥boy，小心身後！」

「Thanks，接我呢招死亡行星啦！」

「喂，其實我哋到底喺度做緊乜？」

「呢件事說來一匹布咁長……」


隨着以長棍接下武士之呼吸柒之型的D Gor陷入回憶片段，鏡頭一轉便來到二十四小時前九龍灣某條後巷。

話說D Gor私下聯絡CLS公司，為團隊制作了一面旗幟，更親手畫上萌物「Nama Beer」，準備攜帶成品回去見團員之際，沒想到竟遇上一位身穿日系制服的女高中生被MK仔包圍。見義勇為的D Gor當然出手相助，卻沒想到那妙齡少女原來是特工假扮，專門欺騙無知男孩的桃色陷阱！

D Gor被四個穿着黑色背心的MK仔包圍。他們一人染了金髮，一人手持棒球棍，一人手執武士刀，一人戴上拳套，武器方面竟比起暴走族更具東瀛影子。

「難道我阿D今日就要栽係你哋班MK手上？」

「聽聞你就係404暴走團嘅D Gor？」

「正是在下，你嘅目的係乜野！」

「冇，我哋九龍灣四煞作為香城MK仔代表，一直都好想會一會你哋班暴走族。不如約個時間，大家切磋切磋下，你話好冇？」為首的鬼塚舞弄山刀，微笑中帶着不容拒絕的眼神。

「邊度、幾時？」

「我哋個schedule有少少緊湊，不如就聽日啦。你哋話好冇？」

「好嘅大佬！」跟班舉腳附和。

「呢度係你哋地頭，你話點就點。」

「咁就一言為定，聽日，約戰大水管之巔，我哋不見不散！走！」鬼塚舉高左臂，五指合攏向前一揮，帶領跟班退場。

「死喇，今次大檸樂喇，我一定要快啲返去通知大家先得！」

可是，愣然站在偉業街街角的D Gor遇上另一難題。他懷中抱着半個33那麼長的旗幟，桿的長度似乎已超出公共交通工具可接納的範圍。正常他陷入苦惱時，一輛漆黑的重型電單車剛好在他面前的紅綠燈前停下。

「嘩，架車咁靚嘅……」

「哥哥仔識貨喎，要唔要搭程順風車？」

跨坐在漆黑重型電單車上的是身穿白色特攻服，背部繡上赤黑色標語，頭綁紅巾、鎖骨下露出刺青，容貌自帶馬賽克格仔的神秘黑框眼鏡型男。型英帥靚正都不足以形容格仔男——的那台電單車。

目光中只容得下電單車的D Gor自然沒有半分遲疑：「拜託請畀我坐你架車！」

一段從九龍灣因胡亂切線走錯高速公路而繞經大嶼山才能折返北區的漫長車程，見證了D Gor與暴走族同好鐵騎士結下的不解之緣。


鏡頭回到當下。沙塵滾滾的荒無之地，兩班人馬迎頭對上，左側站在九龍灣四煞，右側是404暴走團，戰鬥一觸即發。

「哈、我哋今日搭咗成粒鐘巴士先入到嚟新界，就係為咗踢你哋個館，香城最熱血青春嘅組合，係屬於我哋嘅！」鬼塚的刀尖指着四人。

「MK仔都敢踩場？睇我哋點打殘你哋！」404團長主動踏前一步迎戰。

「等陣！開戰之前，傾好贏家嘅獎賞同輸家嘅懲罰先。」九龍灣四煞二把手驚雲提議。

「冇問題，如果我哋輸咗，就將D姐送畀你們。」33無情地把D Gor推出去，一番宣言嚇壞在場眾人。

「喂！你點可以咁過份，想將我哋阿D當成大懲罰送出去？！」Po K本能地強烈反對。

「唔好咁緊張住，嗱，我點會害自己兄弟呢？D Gor係東瀛忍者嚟㗎嘛，識多重影分身之術，是旦變個女忍者分身出嚟應酬應酬咪得囉。」33抓住激動的Po K，在他耳邊悄悄說出完整的計劃。

「哦，原來係咁，好似好有道理喎。」Po K同意了。

「喂你兩條XX，有冇諗過我嘅感受……」

「咁你哋呢？你哋如果輸咗又願意付出咩野代價？」D Gor的發言繼續被無視，肥boy接下話，向MK仔發出提問。

「既然你哋肯攞D姐出嚟賭，我哋當然唔可以輸蝕，同我帶佢上嚟！」鬼塚一聲令下，驚雲和樂少便押着藍髮日本女高中生登場。「如果你哋贏到，我就送佢畀你哋！」

「嘩，呢個女高中生咁高大嘅？」Po K十分真誠。

「你睇真啲，佢男人扮㗎，尋日我就係畀佢呃先中咗九龍灣四煞嘅計……」D Gor痛心疾首，絕望扶額。

「噢、也咩爹～<3」體格壯碩的女高中生發出磁性的嬌喘，現場刮起一陣寒風。

「論嬌嗲，我哋Ｄ姐係唔會輸㗎！上喇D姐！」404暴走團不甘示弱，馬上派出D姐對抗。

「唉，死就死啦……エラー流Ninja、行きますー☆」

「噁——」經歷大型嘔吐現場後，局勢繼續失控升級，大水管之戰如箭在弦。可是重要的問題來了，他們尚欠一個公正的評審見證兩隊人馬的死戰。正當八人苦惱之際，救星終於出現了！

「久等了各位，就等我嚟擔任絕對公平公正嘅裁判啦。」

逆光之下，眾人只見白長袍與紅腰帶在空中飛揚，可是憑著那標誌性的格仔，來者身份已昭然若揭。

「係你？」D Gor愣住。

「香城無人不知無人不曉嘅自肥界最強王者——格仔男？！」九龍灣四煞大吃一驚。

大水管上，威風凜凜的格仔男正式登場！




【第五幕】— Missile Rain


「嘭嘭嘭！」使出一招華麗轉身，叁叁從背後掏出手槍，朝肥boy身後開了一發，擊中目標對象。

「嘭——嘭嘭——」鮮血應聲飛濺。

「嘭嘭—嘭嘭—嘭嘭嘭！」肥boy緊接拋起連着橡皮筋的圓球，在球體落地前一刻腳瓜收緊用力一踢，圓球應聲飛彈，瞬殺眼前十萬大軍。

大水管旁正上映一場失控的混戰。刀光劍影子彈無情，驚天地泣鬼神的打鬥持續了足足五分鐘。

嗶嗶嗶。嗶嗶嗶。倒數計時器響起時，格仔男一蹬，翻個跟斗從大水管一躍而下，完美落地全取十分。

「好，時間到！大家停手，依家嚟總結下戰果，由404先公佈。」

團長收起殺氣騰騰的眼神，袖口抹過額角，擦去臉上的血跡，大聲報數：「我哋四兄弟總共斬殺60隻白紋伊蚊！問你怕未！」

Po K手腕一揮，把盛載無數血肉模糊蚊屍的外賣食物盒拋到九龍灣四煞面前。

鬼塚噗通一聲跪下，痛心疾首捶地高呼，「可惡啊！我哋竟然只係殺得10隻蚊！簡直係天大嘅恥辱啊！」

「本次挑戰結果好明顯，勝出者係404暴走團。」

「啍，想同我哋新界人鬥殺蚊，太天真了！」逃過被出賣一劫的D Gor摟着Po K與肥仔，洋洋得意。

「垃圾！」

「馬鹿！」

「都唔知你拍緊乜！」

「輸咗嘅人準備接受死亡行星大懲罰啦！」等候復仇機會已久的404一行人磨拳擦掌，毫不留情地給予九龍灣四煞死亡攻擊。

與此同時，不懷好意的33目光已緊盯那可憐的女高中生。

「哈哈哈，你哋帶嚟嘅美少女我哋就唔客氣收咗佢喇！兄弟們我哋上！」

「各位大爺～放過小女子啦～」女高中生L傾情配合演出，一邊奮力抵抗逃跑，一邊走音大叫救命。

「美人！你無處可逃㗎喇，乖乖地企定接受哥哥們的死亡之吻啦！」

「也咩爹～～～」

繼香城史上首場《滅蚊之役》後，北區接着放映合家歡片段《追追追追追上我的Agent醬》。雖然失控的場面已無力挽救，可是經此一役後，四人喜獲格仔男賞識，終於在暴走界打出名堂，從此聲名大噪，那便是後話了。




【第陸幕】— Coolest driver's high


「你真係要揼低我？」Po K扯着D Gor袖口，千般不願放他離去。

「相信我Po K，我會返嚟你身邊。」D Gor背向Po K不忍回頭面對愛人的挽留，痛苦的神情盡見其內心掙扎。

「唔好走啊，D Gor。我買咗啲雪糕等緊你食㗎！」

「真心呢……係電單車同雪糕之間，邊個白痴會揀雪糕啊。不過你放心，我一定唔會忘記你㗎！」D Gor把心一橫揮別Po K，頭也不回地邁步前進。

「唔好去啊，D Gor——！」任Po K如何伸長手臂，逝去的感情又如何留得住。


漆黑電單車破風奔馳，純白的旗幟風中搖曳，不死的Nama Beer已給賜予全新生命，自浴火中重生。D Gor緊抱格仔男的腰，單手高舉Nama Beer之旗，興奮地呼叫。

「點啊，爽唔爽？自唔自由啊？」格仔男問。

「太爽喇！Ｗoo！今次終於似番個真正嘅暴走族喇！不過話時話，點解每次揸機車都要揸嚟大嶼山？」

「呢邊車少啲，仲好似話向西會拍到夕陽喎。」

「吓？今日天文台話有煙霞喎。」

「唉，混亂晒真係搞唔掂。坐穩喇，再唔加速後面個的士佬就要問候我哋全家㗎喇。」

「等等！我仲有個問題，」

「嗯？」

「點解麥克哥你好似飯飯都掂，乜都識咁嘅？」

「我冇講過咩？全部都係我老竇喺夏威夷教我㗎。」

「Nani？！」


走過漫長的翔東路，鐵騎士終於帶着D Gor來到海旁，回到兄弟們的身邊。

「兄弟！我返嚟喇！」D Gor脫去頭盔，快步朝向Po K走去。

「足足等咗五個鐘先等到你哋返齊嚟……」眼見愛人迷途知返，Po K感動得流下半滴男兒淚。

「喊乜呢，一早講咗我會返嚟。」無奈中帶着憐惜，D Gor張開兩臂懷抱Po K。

「點知啊，格仔男又靚仔又有才華，萬一你跟佢走咗咁點算啊。」

「講呢啲，最重要嘅係我呢刻喺你身邊。」

「啱啊Po K，一世人兩兄弟，我哋唔會拋低你㗎。」肥boy搭着Po K的肩膀，加入擁抱。

「兄弟我哋撐你！」33憑身高優勢，從外圍抱緊三人。

夕陽下世界被染成橘紅，海邊的四人抱成一團，連途經的路人都能深刻地感受到他們之間密不可分的情誼，紛紛停下來拍手鼓掌。




【終幕】


肥boy、D Gor、格仔男、Po K、33一字排開，雙手插袋，想像那道即將消逝於海平線的日落殘影。

等待他們的絕非黑夜，而是萬丈光芒的明天。

「呢個係關於愛與自由嘅青春熱血故事。」

「我哋係永不放棄，試行錯誤嘅——」

「404暴走團！」

「完。」

「Good take，收工！」