Plurk paste

《我做咗補習天王的小助教》9-14
月更選手嘅廣東話鳩文（溫馨）
食個飯食左半個月：）
帶點粗口w

9
曾經有一份真摯嘅機會擺喺我面前，我無珍惜到。如果上天能夠再比一個機會嘅話，安達想同佢腦細講，我可唔可以唔去。

喂啊，救命點解佢會應承左個飯局架，佢好想返佢個蝸居食杯麵，但食日燒真係好難以抗拒阿!!!

「個靚仔生得牛高馬大，好有氣質呀。」路過嘅女仔係經過安達嘅時候講。

「喂，見唔見到嗰度有個靚仔，我唔掂啦，我條仔有佢甘索我就好啦！ 」又有個路過姐姐係安達未埋身嘅一段距離，已經係咁拍佢閨蜜個膊頭。

「你都on 嘟嘟嘅，有咁索，唔慌佢比帽你戴啊。」佢嘅閨蜜打緊音game沒gut起個頭。

以上對話出現嘅果位靚仔，用腳趾尾都知唔係講緊安達，而係行緊佢隔離嘅青山發電廠aka補習天王，將條行人路行到好似catwalk咁嘅黑澤優一。

就算幾攰，縱使黑澤對眼有啲dup，而響佢身高以下嘅迷弟迷妹亦只會感嘆，哇，眼神撲朔迷離，憂鬱得來又有啲梁朝偉，好朔阿，唔該來殺死禾啊。

同依碌24/7小時識發散電力嘅男人，安達真系壓力好大，仲約埋一齊食好西，媽，我唔係好識social啊~~！

仲有，『喂你行我側邊但唔洗貼到咁埋嫁喔！』但安達梗係唔夠膽講啦，而條路都人多得來的確真系好淺窄。近到安達聞到佢身上有陣幾好聞嘅木味。

而啱啱果位埋頭打緊機嘅路人閨蜜，最後係路人不斷暗示終於望左一眼黑澤同安達正面，呆咗幾秒之後狂搖佢姐妹。「哇！屌啊！你頭先就應該一嘢拍我塊面啦，好撚靚仔啊高果個，行走人間嘅荷爾蒙，穿貼身老西嘅男神級成功人士，我唔掂啦。比枝事前煙我啊唔該，嘶～。佢隔離個純情學弟都好cute嘅啫，個無辜嘅眼神好似小白兔。霸道上司佔有慾極強，配返個弱質纖纖學生哥，好想睇佢兩個搞埋一齊啊！」

安達雖然只係聽到荷爾蒙後，就過左馬路未聽曬，但後面嘅FF，令人不自覺係個六月天打左個冷震。

「你攝親啊？安達？等陣食飯冷氣凍噢，比件褸你蓋下？」黑澤出左句聲。

「啊？唔洗唔洗。好少事。」安達擺擺手。

「你唔洗同我客氣架喔。」黑澤把自己件褸遞左比安達。

安達望住件褸，望住解左兩粒鈕嘅黑澤，有啲難為情，連手上都嗨到腦細個木味呢。

10

黑澤覺得，自己嘅助理兼好友真系好鬼識做人，Mandy拉住六角行在前面無嘢都夾硬拿啲嘢來吹水，越扯越遠，留返啲私人空間比佢地兩個。

行過落牛X嘅路程其實就得個3個字，自佢地落來條街之後，多左好多如狼似虎嘅眼神落在黑澤身上。

黑澤明，佢真係明架，假假地今日梳反個靚頭，最低限度都要砌低香港先生同亞洲先生啦。就係feel到普通人如安達驚青到成隻天竺鼠puipui咁響佢隔離，佢啲保護欲把把聲湧上來，仲勁過大浪灣嘅巨浪。

於是咪越行越埋囉，做得老闆，梗係識得關懷下屬！比埋件衫佢驚佢凍親！第日sick leave就唔好啦。

入咗初夏，正常人出街已經大汗疊細汗，光鮮靚麗如黑澤都會噴五六泵香水遮下汗味嘅精英男，收工仲補噴多次The Tragedy of Lord George，希望無論外在，同埋內在都迷倒佢感興趣嘅人。

但呢，穿得咁乾淨嘅安達，返左成日工竟然沒乜汗味，身上仲有陣好聞嘅BB仔味道～～隻味究竟係來自洗頭水啊，定是柔順劑呢，定是佢噴左啲奶香味香水抑或止汗劑，成件事令黑澤真系好感度up。

於是佢大膽發問，主動出擊。

「安達，你可唔可以介紹下你用緊乜味嘅香水定止汗劑，又幾好聞噢？」

「啊？我沒用香水同止汗劑噢，買左隻薄荷止汗膏，幾好用啊。」安達有啲尷尬R下個頸。

欸？但係薄荷都無乜味啊，唔係喔，黑澤索多兩啖，真系有BB味咧，越聞越鍾意，隻味真係幾似爽身粉幾舒服。

「係咩，仲以為你有噴啲咩味添。會唔會係你有用咩好香嘅洗頭水阿，沖涼液？我想我家姐應該幾中意。」家姐是永遠的擋箭牌。

「hmm沖涼液嘅話。最近誠哥個超市搞promo，我執左件Johnsonbaby沐浴露set，買兩支平得來仲送埋哆啦a夢毛巾，好抵屌阿。」事實上，佢有糾結應該拿melody果隻好啊，定係哆啦a夢果隻。順口得滯，講多咗添，佢尷尬咁望返黑澤。

咁黑澤明啦，順手mark低哆啦a夢先，估唔到安達仔用嘅原因竟然係因為jetso。

「唔通你買藍色果支啊？」

「欸，你點知嫁？你隻鼻甘靈嘅?」

「細個有排用過囉，都幾中意。不過小學畢業就沒用lu，牛奶果隻都好用姐。」

「啊，我都幾鍾意果款！見平咪課囉。」

安達就咁好自然比黑澤帶起左個話題，一問一答都算係解除尷尬mode。

11

手上掛住腦細件褸嘅安達，總算捱到牛X門口。

牛X在香港開分店嘅果排，黑澤有帶過成班crew一齊來食過兩三次，順便就做埋個金會員。入席好快，侍應帶住四人入座卡座，在Mandy同黑澤有意為之下，安達同黑澤打對面坐share一個爐。

牛X係手機落單，黑澤雖然冇辦法好型咁攞個菜單揮手同侍應講，人來！同我上最貴嘅肉比我個安達仔仔！之不過型得來又要優雅知性！係嚮小細節到表現架！

「我地揀咩肉好啊？前輩。」六角開聲。

Mandy桑依個時候就出聲啦。「是咁的，同大家講翻聲，食肉質差嘅肉，不如慳D錢去Citysuper或者其他出口店買返啲勁嘅靚牛返屋企燒好過啦。所以，我地枱一係唔叫，要叫就叫最貴嘅鹿兒島黑毛和牛！... ...」

「下？？？一來就LV5。」安達真系嚇親。哇！做補習天王真是好有米！！我咁大個仔未食過咁豪！黑澤條腿真係要好好攬實，食一餐就已經成日工資！自己連叫個lv1食雞同豬，佢都已經唔捨得。

「我地一齊來，多謝腦細！！！」Mandy繼續講。

「多謝腦細！」「多謝腦細！」六角同安達好比面和應，相對六角嘅熱情如火，而安達叫得略為細聲又羞澀。黑澤望在眼底，唔知點解佢越睇越鍾意。

「慰勞下大家，歡迎入職豐川！Mandy你地自己叫啦，安達睇下想選邊啲小菜可以自己嗌，我來點主食。」黑澤一邊講一邊先點左佢同安達食個set之後，再叫埋個檸檬，點知抬頭見安達好困擾咁望著menu。

「安達？」

「係！」本身督下掃下有啲乜嘢食的安達開始選擇困難症發作，又比人叫一下，差啲又想彈起身。

「做咩姐，食飯唔好咁緊張噢。叫左嘢飲先，想飲乜？」黑澤又忍唔住為佢好似如臨大敵個苦惱樣笑左，真係好得意。

「我望下先，呃，柚子茶又好似唔錯，巨峰都好哦，蘋果汁都好想飲。點指兵兵點到誰人做大兵。啊，巨峰先啦。」安達總算下到決定，鬆左口氣。

「我都鐘意飲依隻噢，跟你機先。」黑澤個機心仔一於點左兩杯巨峰提子梳打。

盛盒好快趣就送到，野飲隨後都上埋。黑澤就將兩杯巨峰梳打擺在爐嘅兩邊，自己果杯在安達左邊，而安達果杯就放在佢右手方便佢拿。

「有冇乜嘢唔食？」黑澤捲起衫袖，拿住個夾開始用個檸檬搽勻個燒烤爐。

「沒啊。都食得！」

腦細真係好好服務，今日又食又唔洗做，佢仲用腦細件衫蓋左在大脾，上面再鋪塊大紙巾。

安達有諗過拿支夾幫黑澤燒，張枱除左黑澤果支夾之外，目前好似沒第二個夾。算，放棄mode，諗住黑澤夾乜，佢就決定食乜。安達宜家就唯有幫黑澤同自己個調味碟落醬油，跟住幫自己喪加大蒜汁。

安達望住黑澤認真地搽爐。「黑澤你真係好專業啊。」

「搽檸檬除左令塊網沒咁癡住之餘，仲會少啲燶同黑。」黑澤對住安達俏皮咁wink。然後飲左啖自己杯嘢飲。

「原來係咁！你好犀利啊。」安達諗黑澤睇來好易相處咁。

「平日自己一個住，有煮開飯，有關注依方面嘅嘢。」黑澤謙虛咁回應，比心儀對象讚，在人見唔到的地方都忍唔住開心地好細限度咁翹起自己對腳，然後就開始認真燒第一輪的肉。

啲肉燒到Jar Jar聲，真系好香，安達忍唔住叫左句「inevitable！」

「第一舊，醒你嘅！」黑澤見安達望住啲肉發曬光，即刻夾幾舊燒得幾靚嘅比佢。望完對方笑得成個細路哥，黑澤專心咁繼續夾埋落自己碗嘅時候。

點知對方發出慘叫，「多謝... ... 啊好辣好辣。」，佢向後仰，隻腳就咁掂到黑澤嘅小腿內側。

依個就係有長腳嘅煩惱，黑澤如果唔係因為第一日識安達，佢可能會忍唔住就拿佢對腳同人調情。正人君子應該正襟危坐，克制，要克制啊！

「你無野嘛?」黑澤即刻問。

只見安達來手拿左近黑澤那杯野飲飲左一大啖降火，飲得剩反半杯，放低杯巨峰提子。

「阿，舒服曬。」

再望，唔單止黑澤靜左，對面果兩位同枱明明在肉山歡暢嘅Mandy同六角都望住佢。

「做咩，你地望住我，唔通我塊面有啲乜??」安達摸左下自己塊面。

六角出聲先，「安達哥你飲左腦細果杯梳打啊。」然後同Mandy笑到飆眼水。

「啊啊啊啊點扇巧????」安達大叫。仆街佢完全忘記左黑澤仲在佢面前飲過添，最衰慣用手係左手，一來手就拿左人地飲果杯。

黑澤心入面都偷笑左陣，見安達咁大反應，即刻打圓場，「沒野沒野，放題想叫幾多杯都得，安達辣親，手忙腳亂拿錯來飲好正常姐。」

「對唔住啊，我即刻叫多杯比你啊。」安達想拿手機出來scan個code。

「你果杯飲過未？」黑澤淡定咁問，但佢心情確實有啲愉悅。

「未啊。」安達從手機到抬頭。

「咁我飲反你果杯就得啦，你想自己叫多杯新嘅，定係飲反啱啱果杯？」黑澤問。

「呃。」安達糾結左幾秒。「我都係飲埋哩杯先啦。我抽反枝吸管過你，都飲咗，都係唔好嘥啦。」

佢今次醒啦，想食嘅就呼呼呼吹到凍，抑或係攤凍先食。

12

紫菜飯一到，安達就哼住首媽咪麵嘅歌狂撒七味粉，成個碗鋪咗粉佢先收手。

黑澤望住安達仙女散花嘅落粉方式呆咗幾秒。但係哼歌依part真係好好笑。

「咦，黑澤你都想落粉啊。」

「阿?」黑澤沉浸在岩岩安達仔演唱會入面。

「哎呀，sorly啊，得反半枝添。仲有啲，你要嘛?」安達拿返濕紙巾抹手，望住黑澤眼甘甘以為佢都想要。

「阿?唔洗唔洗，我唔食辣架。你鐘意你撒曬佢啦。」黑澤就將批肉翻曬啲面。

安達食咗幾啖紫菜飯，飲左啖新叫嘅可樂，見到黑澤仲在到燒緊嘢。「黑澤你唔好搞住先啦，你都食飯啦。搞到我想買反個燒汁，下次去donki掃貨先。」使腦細做嘢真系好有罪惡感。

「好啦，我會食架啦。枝燒汁我屋企有多噢，你要嘛?」黑澤拿起隻羹潷左啖飯，安達食相真係好香，望住佢真系好好送飯。

「阿?禾自己入貨買方便啲，李留翻俾自己落啦。」安達個小餓鬼啊邊食邊講仲癡左粒飯在塊面到。

「安達你嘴邊，有飯粒。你想留反屋企做宵夜啊。」

個大頭蝦啊真係好趣緻，黑澤笑住咁指左指嘴角。

「下？」安達摸向嘴角。

「另一邊啊。」「喔！」安達就沒留戀果粒飯粒嘅，放反張枱到，不過黑澤係有啲衝動想幫佢食埋。

「嗯，黑澤啊?」

kill緊牛舌嘅黑澤，望住安達有啲扭扭擰擰。「嗯~?」

「紫菜飯好好食啊，我...可唔可以叫第二碗啊?」安達有啲怕羞，驚人話佢大食。阿媽話，甘大食會食窮郎。

「傻豬來嘅，想食幾多唔洗同我講架。你睇下Mandy佢地都食緊第三碗啦。」安達叫野嘅時候會同黑澤報備，真係好識體貼佢個荷包。

「多謝黑澤！」安達開心甘叫埋碗飯，諗住想點杯最後嘅野飲收尾，依個好似唔錯噢，有菠蘿，薄荷應該都幾清新，落唔落好呢。

「哇！甘Q難飲嘅，好似飲緊牙膏甘。」六角扒好大啖紫菜飯配牛肉嘅時候，灌左啖新叫來嘅梳打。

「咦，你叫左咩啊?六角。」安達出於同事愛所以問。

「安達哥，你千企千企唔好叫菠蘿薄荷特飲。哇好鬼伏啊~~我好似食緊自己刷果隻舒x達牙膏甘，早知唔好信Mandy做勇者。」六角揦囗揦面推開杯嘢飲。

「喂阿，我一野飲曬到底啦噢，幾消滯幾清新啊。」Mandy不服。「定係安達你同黑澤一齊share半杯試下?」

「唔好玩新人啦，衰仔。」黑澤輕輕撞咗下Mandy個脖頭。

「哎呀，痛啊，小心工傷我請一日假。唔係噢，真係好飲噢！信我啦！」Mandy開玩笑lam左lam嘴，又眨眨眼。

「你扮啦你，日日上gym room。你剩係掛住放假啦。」黑澤真係沒好氣。

「我...我諗緊係叫蘋果汁好啦。落咗單啦。」安達都係快快趣落單以免夜長夢多。

黑澤依個時候在枱底撞咗下Mandy，然後就比咗個眼神佢歎下。

「so 9 sad，我覺得你真係要試下咧。做個勇者！六角係男人你同我啪曬成杯佢。」Mandy望咗眼黑澤個你睇住來嘅眼神，轉風向搵反六角隻抽。

「哇，你好奸矛姐。就陪你隊曬佢。」六角拍心口，然後又飲咗啖，但個樣苦過迪迪。

「安達，你太瘦啦，食埋依幾舊牛啦，件雞有沒興趣阿。」黑澤轉而溫柔又有風度甘係甘則啊安達食野。小白兔餵乜食乜，真係睇來好好湊。

「哦哦，多謝黑澤。」安達繼續乖乖緊扒飯食黑澤投餵過來嘅肉山。

13

臨近10點搭9，四人終於從餐廳行出來。

「超好食啊依餐，係啦，仲有多謝你件褸啊，黑澤。」安達出門口把件褸還反比黑澤。

唯一可惜嘅係嗨到燒肉味，唔係就收集到安達嘅bb仔味啦。黑澤內心可惜但面帶笑容接返件衫。「睇住身子啊。」

「阿~好飽啊，我個肚飽到似六月懷胎。」六角扶住個腰跟住大家行出來。

「臨尾啪咗杯生啤，call咗的士翻屋企，唔順路，部車交比你，泊咗在二期果邊噢。」Mandy掉咗串車匙比黑澤。

「OK。安達返邊到，車埋你?」黑澤收到Mandy個暗示，即刻乘勝追擊。

「阿，我住觀塘，搭鐵兩個站翻去好近啊。」

「我又搭！安達哥你都搭啦。」六角插把嘴。

黑澤心諗，六角如果你只講後面那句我會更加感激你。我記住你，你個衰仔。

六角feel到背後一涼，望向身後，黑澤好和藹咁望著佢。咦，唔通錯覺。

「你住彩虹邨甘近，最多我的士車埋你囉。我地同一個方向啊。喂，走啦，我架車仲有5分鐘到。來啦，六角。」Mandy拐走六角。

「哇你真係好好啊，Mandy前輩。」六角雙手合十星星眼跟住Mandy走左。

「傻啦。一場同事。」你阻住人地溝仔啊傻仔。

得反黑澤同安達，「坐我車?」

「多謝。」安達諗唉腦細既然甘好就順水推舟啦。

安達食得好飽已經進入賢者模式，開始懶懶閒甘行路，佢好想反歸快啲沖涼訓覺阿。

兩個人落到停車場之前，黑澤成功套到安達嘅電話number同IG。不過呢就有啲upset嘅係。

「咦，安達你有沒fb?」

「有啊，但啲人話Fb唔啱後生仔，於是我都轉玩IG有好多年啦。」仲成日用fb睇news feed加大同中同吹水嘅黑澤中咗一槍。

「甘我add你IG?我個ig雖然有開public，但我拿我個private IG fo你阿。」黑澤都好彩佢有因為班學生所以都算係跟上潮流。

「阿，甘啊，甘我都，比我個private你啦，但我唔點po野架噢。」安達本身諗住比佢個public過佢應付就算。但係既然腦細出聲要private就同佢換下甘啦，最多story唔開密友比佢囉。

安達連個名都特別普通，IG名就甘chrison321，不過真係好容易令人諗起Chris wong。

Joseph703，好有名師風範，但係真系忍唔住諗去果度呢，安達快速瞄左眼對方下半身，嗯，唔會嘅，咁大，哎呀我諗咁啲乜嘢喔。

「咦，所以你有public架?」黑澤見到個安達嘅bio有個ig名Adachi_kiyoshi。

「嗯，果個係放我嘅design嘅IG，我中意畫野，平日會up啲畫上去，有原創同二創，做過下擺檔，同約稿甘。」食飽飽嘅賢者安達淡淡地描述自己嘅藝術領域。

「好靚噢！有機會不如來幫我本textbook畫cover啦!」黑澤click開一睇，原創風格雖略帶抽像，但色彩嘅運用既大膽同安達睇落個性格大相徑庭。二創則係主要圍繞近期佢有追開嘅動漫角色，專畫同人畫。

「下?我唔掂架噢。」

「你太謙虛啦。我地可以合作下。幫手畫啲野都好啊，我驚我啲cover帶比學生審美疲勞啊。」安達心諗你有唔少學生就係衝住你個樣先來補你嘅，cover大轉風格，大家咪圍剿我？？

「比啲時間我考慮下啦。」

上咗架黑澤架奧迪之後，安達仲未驚歎完架豪車，黑澤交咗個電話比安達。

「誒?」

「入你個地址落個map到導航啊。」

「噢好。」安達好乖甘輸入自己個地址，點知黑澤第二下嘅舉動嚇到佢差啲扔左部機出車。

「幫你扣安全帶啊。我地出停車場啦。」黑澤貼心甘幫對方啪埋個扣。

「吓啊啊啊，哦，好嘅，我入好啦。」如果唔係比安全帶束縛，黑澤依下嘅體貼，有啲想碌出車後走夾唔抖。哇，黑澤甘識依挺野，慌死溝唔到女噢。冷靜啲啊安達，安全帶咋!

黑澤望左眼面又紅曬嘅安達，笑住穩左個citypop song list播下，緩和下氣氛。

從德福出發，黑澤渣住架車從德福出來，沿著megabox後面上橋，駛入觀塘繞道，安達望住個窗到想住避開黑澤視線，而面對對面嘅夜景燈色，佢都係忍唔住口。「哇，咁夜仲好靚啊對面。」

「安達，應該有來過依邊可？」

「有係有，之前有試過早上搭巴士經過，又係另一種景色。」

「望住個海真系令人好平靜。」黑澤望左眼安達睇緊嘅方向，依家嘅環境真系好舒服。

「有機會都想早收工嘅時候試下行海濱長廊。」安達拿左部手機影左幾張相。

「你講到我都有啲興趣，不過有時忙到打仗咁，反而我會選擇揸車放鬆。」

「嗯，我好似有左啲新嘅畫畫靈感。」

14

車好快駛入安達住嘅工廈。

「出面放我落來就得啦。」

「送埋你入去啦，入面有車位。」

黑澤架奧迪路過保安室嘅時候，安達仲特登同個保安揮左下手。個保安求其點左下頭。

「咦你地識架！」黑澤打方向盤倒車入庫。

「係啊，翔哥好睇住我架。」

架車終於泊好。

「咁啊，我，上...」安達解開安全帶。

「安達，不如，請我飲杯茶？」黑澤有啲情不自禁講左出口。

「下？飲茶，我上面新入伙，得可樂咋噢，定係雪碧。」安達望左下唔係噢，工廈架lift隔離咪有嘢飲機囉，咁會唔會顯得自己好無誠意。

「沒所謂，可樂都OK架。」黑澤即刻lur飯應。

「我諗到啦，你等我一陣下，唔好走住。」安達超快地落車，然後跑出工廈。

黑澤伸出爾康手，安達仔又走咁鬼快嘅，平日行路就差啲平地摔，跑步又唔見佢撲親喔。

黑澤on居居留在架車到無所事事。火力依然旺盛嘅佢有啲後悔衝口而出添。

等左10分鐘，人未到。時間過得好慢好煎熬。

等左15分鐘，人都係未出現。黑澤真系忍唔住摸左下個手機。要唔要就咁講叫佢返來，佢就咁開車走人？但係都係唔好，等埋佢返來先。

等到四個字啦，安達口中嘅翔哥用手吊住佢碌電筒fing下fing下，一隻手拿住包柱侯齋燒鵝，另一隻手插落個零食袋，邊行邊𡁻住過來。

行到過來啦，佢拍左下黑澤個車門。

「阿先生，泊車超半個鐘嘅話我地會收返你泊車費喔。」黑澤聞到翔哥身上有陣淡淡嘅酒馟。乜返夜更就可以飲酒架咩。

「喔，好嘅沒問題。」黑澤唔拘依啲小錢，總之，安達，應該會返來架可？

跟住後面嘅安達仔話講就到。

「翔哥～～～識架識架，我阿頭啊。」安達小跑過來同翔哥解釋返。

「我地跟規矩做阿嘛，成個場得佢沒停車熄匙。循例過來望下。你睇住來啊。」

「嗯，知啦。下次我叫佢出來等啊。」安達估應該沒下次掛。

見係安達，黑澤就想開門。唔通真系有得上去？？安達走去買左啲咩。

只見安達行過來阻住佢開車個嚹位，將枝黑媽媽嘅嘢飲隊左比黑澤。

「涼茶舖就來閂啦，都比我買到枝涼茶啊。舖頭得返廿四味同五花茶啊。我買左五花茶比你。」

黑澤依下就算下面幾扯火，望住隻涼茶，依家真系唔慌唔下火啦。

TBC
奉上一張hea p 飯聚(不過安達其實穿緊嘅係淺色襯衫搭白tee），你地腦補下啦。