Plurk paste

鍾會X劉禪 《第一次上宿舍》


一年一度聖誕節又嚟啦，成條街啲商鋪就好似依個世界上淨係得返幾首歌咁，唔係播緊We wish you a merry Christmas，就係Jingle bells，年年都係咁，洗腦到大家都習慣曬。

不過，依一刻既劉禪根本無心機去理會依件事。因為劉禪依家企係港大門口等緊鍾會放學，隻眼係咁四圍望一副就快望穿春水咁既款，成個腦都只係諗緊鍾會幾時出現，又點會有心情去聽歌呢？

講真，劉禪其實無諗到鍾會會主動約自己係聖誕節見面，畢竟之前見面果陣鍾會既態度都比較敷衍，所以佢都已經有一排無主動send message比鍾會，費時打搞到佢。

但從上個禮拜開始，鍾會竟然主動send message嚟問佢食咗早餐未，雖然只係一句好簡單既問侯，但劉禪已經開心到係張床度「顛」咗兩下，然後成朝都笑到見牙唔見眼咁既款，就連老細都忍唔住問佢係咪中咗六合彩。當然，係劉禪眼中，鍾會既主動簡直比中咗六合彩更加令佢開心啦。

所謂好事接踵而來，鍾會除咗主動send message，居然仲主動提到最近見面次數有啲少，要唔要見下面。見到鍾會都開咗紅燈，劉禪梗係借依個機會問下佢聖誕節得唔得閒啦。係鍾會未答覆之前，劉禪心入面一直羅羅攣，唔知道鍾會肯唔肯應承，所以當劉禪收到鍾會既whatapp OK sticker果陣真係開心到爆。

「喂，你係度發咩呆呀？」唔知幾時鍾會已經企係劉禪面前，見到劉禪成個人好似放空腦袋咁，就忍唔住出手彈咗佢額頭一下。

「咦？你放學嗱？」劉禪摸住自己被人彈咗下既額頭，有啲傻笑咁問：「你之前一直扮神秘死都唔講今日既行程係咩，你到底有咩打算啫？」

鍾會聽到之後挑咗一下眉毛，眼神瞄咗下港大既方向，劉禪原本興奮既樣即刻就頹咗少少，心諗既然約會地點仲係港大，咁就唔好搞到咁神祕，搞到佢咁期待啦。見到劉禪果樣頹咗，就好像一隻黑狗垂低咗兩隻耳仔咁既可憐款，鍾會忍唔住笑咗一笑，「我本身想帶你去宿舍同你二人世界，不過見你咁既樣，你好似比較想係出面同其他人一齊係一間又細又窄又貴又唔好食既餐廳度迫嚟迫去？」

劉禪一聽到宿舍依兩個字，雙眼立即發曬青光，佢Ｏ住嘴，表情歡喜中夾雜住幾分驚訝，「你要帶我去你間房度？」所謂平安夜，失身夜，雖然今日係聖誕節正日，不過都一樣既啫？

鍾會見劉禪個神情有啲唔對路，大約估到下對方諗緊咩，一時之間都唔知好嬲定好笑。本來想直接嘴炮劉禪唔好精蟲上腦得咁快，因為佢根本就未諗到話要同佢發展到依一步，但當佢想開口果陣又發現自己對於同劉禪上床依件事，似乎並唔太抗拒，於是到最後佢只係又彈一下劉禪個額頭：「你諗咗去邊？只係帶你上去睇下戲咋！」

劉禪呆咗一下，仲以為鍾會會冷冰冰咁嘴炮毒舌自己，結果迎嚟既只係一下唔輕唔重既彈額頭，劉禪意會到對方既不抗拒，立即笑到好似烚熟狗頭咁既款：「好好好，只係睇戲，只係睇戲～」

鍾會聽到後冷哼咗一聲，劉禪忍唔住又笑咗一笑，心諗：比起之前鍾會對佢既敷衍，鍾會肯比佢上去宿舍，四捨五入都可以算係表白掛？至少，鍾會肯比佢再行近一步先吖？

當然，果陣既佢地根本無諗到，佢地既第一次真係會係宿舍度發生，而劉禪更加諗唔到，當日後鍾會正式向佢表白果陣，佢將會迎嚟比人表白加真相揭曉既雙重衝擊。

不過，依啲都係之後既事啦。

（完）