Plurk paste

趁仲記得，寫返個生產記錄先～湊Ｂ真係好忙，逐Ｄ逐Ｄ寫，寫到依家…^^b
以下係超超超長文啊～
29/3 38週，同ＢＢ講足40週先好出來～點知係30/3 38週1日 0430左右Ｍ痛…去完廁所，仍是痛，連後腰都痛…大肚以來，我未試過Ｍ痛，一來就後腰都痛埋，預習都冇…不停換姿勢，都是痛。咁9成係陣痛了，望下鐘計時，10-5mins痛一次，咁密ge?即刻再執下走佬袋、梳洗下，叫老公起身，0700左右出發坐的士。
去到醫院，入去登記，已經冇得用電話…登記完就去檢查，我中左Ｂ鏈…一check我已經開左２度！即刻人工穿水，唔痛，再check開左３度，直入產房。所以我冇入過產前房、待產房～老公可以一直陪我。陣痛呢，開頭只係Ｍ痛咁，我以前Ｍ痛好勁，所以頂得住。過左唔知幾耐，開始頂唔順，要老公搓腰就舒服Ｄ。之後有姑娘入黎，問我要唔要笑氣，我話要。笑氣對我好有用，吸完個咀痺痺地，只聽到自己呼吸聲。期間姑娘要我去vv,但我冇食野飲野，冇vv去到，就插尿喉，係有Ｄ唔舒服，但吸住笑氣都ok。陣痛越來越痛，開始痛到叫”好痛”...腰痛到爆…老公搓腰有效過笑氣。姑娘再入黎check,開晒啦！10度了！可以試生！
期間姑娘見我吸笑氣冇停過，就叫我痛先好吸，唔痛唔好吸。但我上網睇過，笑氣係要痛前幾秒吸先有效。信下姑娘啦，我頂！痛先吸冇用ga,痛死我！我唔理啦，笑氣唔離手！開晒10度，真係冇乜痛，只有急屎feel。我冇力屙，所以生好耐，差Ｄ要揾工具協助，好彩最後都係14:25成功生到小Ｂ出來～由陣痛到出世，用左10個鐘。下面冇剪但爆左，縫左幾針。縫針時小Ｂ係我心口，我吸住笑氣，所以都唔太痛。見到小Ｂ，真係好感動！陀左咁耐，終於見到小Ｂ，一直期待ge ＢＢ出世啦～喊左。之前仲好擔心自己會唔鐘意男仔小Ｂ，但見到小Ｂ果一刻，我就知道我好鐘意、好愛小Ｂ，始終我咁辛苦先生到小Ｂ出來！
生完，推出產房，媽媽係產房外了～上到產後房，ＢＢ和我分開一陣，過一陣又推返來，餵人奶了。惡夢開始…
我根本超少奶，我冇見過我有奶，同姑娘講，姑娘只叫我埋身餵，ＢＢ飲左咪見唔到有奶，BB飮得好好,照餵就得。姑娘又用力揸我，先揸到一滴，就話我有奶。我信姑娘lor。出院前見兒科醫生,小B一切正常,黃疸也沒事。出院前仲屙左橙尿，我按鐘叫人來睇。姑娘睇完,話正常,上一次小便隔太耐先會咁,我又信左佢。但其實小Ｂ係飲唔夠...我到第二日去健康院先知...
講返自己先，傷口好快已經唔係點痛…落得床冇耐，我已經行得好順利。出院果時健步如飛～係唔夠瞓…
1/4 晚上出院,因為要全日餵奶都冇得瞓,小B又突然提早咁多出世,都未執好屋。所以一返屋企我都冇瞓過張床咁滯,半夜自己一個執屋。
2/4 去健康院，小Ｂ一check黃疸，超晒標…體重又跌左好多…要即刻去急症室…飛的去急症，ＢＢ要留院…ＢＢ返屋企24小時都冇又入返去…去到兒科病房,姑娘即刻開支奶比BB,BB好快飲晒。我超少奶，ＢＢ唔夠飲…生完ＢＢ冇耐就要同ＢＢ分開，更加冇奶啦…提早出世ge關係，奶泵都未買，死火lor…好在我個四月媽媽谷有個媽媽可以借全新奶泵比我，真係大救星！返去泵，有少少奶～但真係好少，得幾滴。
3/4去醫院探BB,BB要留院5日...除黃疸外,仲有發炎,要打抗生素...生完ＢＢ冇耐就要同ＢＢ分開５、６日…我日日早晚都去醫院探ＢＢ２次，比ＢＢ埋身再補奶粉。坐月？乜黎㗎？食得㗎？成個４月都不停要去醫院、健康院，探ＢＢ、我覆診、ＢＢ覆診，走來走去，邊有時間休息…又要泵奶，根本冇好好休息過…
產後抑鬱都開始出現…ＢＢ未出院時，我掛住ＢＢ掛到喊，仲有幻聽，經常都聽到ＢＢ喊聲，但我好清楚附近係冇其他ＢＢ，只係小Ｂ未返先會咁，所以冇理Ｄ幻聽。到ＢＢ出院，幻聽已經冇左，但抑鬱依然有。
4／４陪月的第二日上班＋社康姑娘第一次探訪。我feel到我有Ｄ唔正常，平時我唔會同第一次、唔熟ge人，好好傾，因為我慢熱…但呢日我竟然同佢地好好傾，我講左好多野…我知道我唔夠瞓，已經令我唔多正常…orz姑娘話我傷口好晒咁滯～
係ＢＢ住院果幾日，我覺得生Ｂ呢件事，好似發左場夢…我行得走得、傷口唔痛、ＢＢ又唔係身邊、個肚冇左，陀Ｂ丶生Ｂ好似冇發生過一樣…
7／４ ＢＢ出院了～我抑鬱正式嚴重起來…因為陪月放工後，老公瞓左，我就一個人湊Ｂ，冇乜瞓過ge情況下，新手媽媽要獨自照顧新生嬰兒精神係會崩潰㗎…
9／４社康姑娘再次探訪，話我抑鬱指數幾高下，轉介我第二日去醫院跟進。
10／４去醫院，只係同情緒姑娘傾下。老公都開始幫手換片，陪月係度我可以瞓到大約４個鐘一日。慢慢抑鬱就少了～
奶呢我就一直都少，小Ｂ主要係食奶粉，我Ｄ奶點心黎，主要比到抗體小Ｂ就好，營養靠奶粉～唔追奶lu,一陣抑鬱返來仲大鑊。
小Ｂ食奶粉都食得好好～瘦叉養到變肥美叉燒～我體力都追唔上佢體重增長…
記錄到此為止，再寫落去變湊Ｂ記錄了～