Plurk paste

4。
良心發現之後，黑澤想第二日約安達去間中環高級少少嘅cafe見面。好彩安達返工時間好flexible，即刻話okay，仲要好認真咁問黑澤自己有啲咩要帶，駛唔駛準備啲咩文件咁。黑澤真係俾呢個傻仔搞到頂心頂肺、心痛個種。因乜解救佢個人咁鬼死純情仲可以係保險呢啲黑暗業界生存咁多年㗎？佢啊頭係咪痴鳩線㗎？咁撚誠實，咁撚無害，都可以鬧得落口？仲要日日鬧佢？俾我知道安達bb啊頭係乜水我一定要珅返佢十皮八皮。

黑澤愈諗就愈嬲，無端端屌埋安達啊頭。佢即刻就請左聽日假，諗住執好個迷人look先至見安達。

***
「Hi..好耐冇見..」
安達一到咗cafe即刻就見到黑澤。話唒佢呢個非一般嘅顏值係啲凡人入面真係特別突出。

「Hello!!坐啊!叫野食先啦!」

黑澤遞左本menu比安達。今晚安達又著咗件大咗成個size嘅西裝出嚟啦。同上次一樣，佢個頭又冇梳好啦⋯望住有啲選擇困難嘅安達，見佢揭黎揭去都唔知叫咩食咁，黑澤拎起咗佢本menu。

「不如我幫你叫吖？」

***
「嘩！你點知我鐘意食呢啲㗎？」
「唔知㗎⋯估㗎喳」

黑澤記返起上次安達見佢個陣叫咗個免治牛肉飯，所以今次就叫返個肉醬意粉比佢，估佢應該係鐘意食蕃茄醬掛。點知又真係比佢估中咗。安達仲勁興奮咁樣彈下彈下。

我頂⋯你唔好咁QQ得唔得⋯

黑澤差啲就講咗出嚟。好彩冇喳，如果唔係安達應該會即刻比佢嚇走咗。佢哋兩個食咗一陣，安達就拎咗啲文件出嚟。

「黑澤呀⋯雖然你冇講要啲咩，不過我琴日自己都準備咗啲你幫我投資個陣應該會用到嘅資料，我俾咗你先吖」之後仲雙手咁樣遞比黑澤。

成件事真係好似收情書。黑澤以前都收唔少，不過咁有feel真係第一次，仲要今次唔係情書，只係一條甘願上吊嘅水魚。黑澤真係有啲睇唔過眼。

「安達你⋯做乜咁信我姐，你呢啲個人資料好重要㗎喎，你又未聽我介紹個plan」

「因為我信黑澤你一定唔會呃我㗎」
安達好難得咁坐直咗。

「你咁好人，明明只係上網傾咗兩句就幫我買咗個plan，多得你我個個月先冇再俾啊頭鬧⋯」

又講起啊頭！黑澤又開始嬲嬲地。

「你咁快幫我買咗，我個下又冇錢即刻幫返你買，我真係好過意唔去⋯」
之後安達仲拎咗張信用卡出嚟。
「雖然都已經過咗幾個月⋯不過我今個月手頭終於鬆啲啦，所以你幫我搞啦，我信唒你㗎啦」

黑澤真係shock到定咗係到。佢都唔知要喊定要笑好。比埋張卡我？安達啊你唔好咁啦你真係好冇危機意識啊大佬！如果你唔係比我呃係比其他姣婆呃，咁咪渣得冇得整？

就係呢一刻，黑澤決定咗，要保護好安達呢個世上唯一嘅純情boi。冇人可以糟蹋到佢！Over my dead body!!

「你⋯你做多咗啦」
黑澤推返啲資料俾安達。
「其實我今個月都已經跑到爆唒數，唔駛再跑啦，所以我今日先請假出嚟」

「下⋯咁好嘅⋯咁我下個月再幫你買啦⋯」
安達有啲失望咁樣擺返好啲資料同張卡。
黑澤即刻就捉住左佢隻手仔。
「唔駛啦。」
「下？」
「我話你唔駛幫我買返吖！本身都係我自己需要先買咋嘛，關幫唔幫咩事姐，你唔駛咁care喎」
「但係⋯」
「唔好但係啦」
今舖到黑澤拎自己張卡出嚟。
「不如講反你公司啲保險呀？你哋仲有咩其他？我阿爸阿媽阿婆阿公阿妹家姐姨媽姑姐三姑六婆都話有興趣啊」

5。

而家終於可以正式講，黑澤個頭已經濕撚晒、乾唔返個種。佢而家係cafe又忍唔住直接同安達買多咗幾份保啦。唔理係乜保，總之係入安達數佢就買咗。只要安達有錢收，呀頭唔再鬧佢，黑澤就Ok。

「um..我哋公司有呢啲囉」
安達拎咗本leaflet出嚟。黑澤扮下野揭咗兩揭，求其打開咗一頁就話要，全程對眼都冇離開過安達。

「咦⋯呢個係女性疾病plan喎⋯黑澤你要黎做咩啊⋯你唔好買呢個啦⋯」

如果唔係安達講，黑澤都唔知自己原來指左呢個plan。不過扮嘢梗係要扮到底㗎啦。

「我幫我家姐買㗎」
「嘩原來你有家姐㗎？」
安達用咗上目線黎望住黑澤。黑澤呢一下簡直以為自己下一秒就會歸西。
「好⋯可愛⋯」
「咩話？」

仆街！今次黑澤真係忍唔住講咗出嚟！不過下一秒佢就即刻兜返。

「我係話係呀！我有家姐！佢好可愛！」

佢不禁感歎自己好彩做開倫敦金，鳩up能力滿分姐。如果唔係真係社會性死亡。

安達笑左出嚟。笑到軟萌軟萌咁、黑澤覺得連佢身邊嘅氣氛都即刻柔軟咗。

「睇嚟你同你家姐好friend咁喎、真係好呀～」

明明自己同家姐完全係河水不犯井水，有野先會搵下大家，一年都唔知有冇見超過十次。不過係呢啲時候，黑澤梗係要維持返自己完美靚仔嘅人設。

「係㗎！平時家姐成日無端端跑黎我屋企，我都會俾佢住反幾晚，飲醉我又會幫佢落妝，煮下野食比佢咁，我地感情好好㗎！」

「嘩⋯而家真係好少可仲聽到有人話自己同家姐friend⋯黑澤你真係好好呀⋯」

安達係心入面就黎要當黑澤神咁拜。點解會有啲咁完美嘅人㗎，做野又叻，性格又好，又勁靚仔，同屋企人關係又好，一定係個孝順仔。仲有呢個fit到爆嘅身材，平時一定操開啦⋯安達有時真係好懷疑黑澤究竟係咪真人黎，竟然可以有人完美到好似二次元咁。

黑澤見安達信到十足即刻放心唒。好彩佢易呃姐。安達咁老實，係呢個世界真係好危險呀⋯好擔心。黑澤決定左自己就算死都會保護佢，唔會俾佢以外嘅人呃到安達！

「哈哈⋯你呢？有冇咩兄弟姊妹啊？」
「我有細佬啊，不過佢一早就結咗婚，連人帶球走咗去台灣啦。佢成日都唔返黎，好耐冇見過佢lu。」
「喔⋯所以你同屋企人住㗎？」
「唔係啊，畢咗業之後就出咗嚟住啦」

重點資訊GET!!黑澤決定一陣要mark返落備忘錄到。

「姐係你一個人住？」
「係呀」
「住邊？」 黑澤有啲心急，問得有啲chur。不過好彩安達冇覺得好怪。

「我住深水埗啊」

6。
估唔到閲女無數嘅黑澤都會有咁嘅時候。黑澤覺得自己正式沉咗船。雖然好似話扑過野先可以叫沉船⋯不過總之就係沉咗船啦。

黑澤都冇諗過會搞成咁。
但係黑澤發現，自己真係好鬼死鍾意安達。鐘意到好辛苦。

喂啊⋯點解安達仲未覆我㗎⋯已經五分鐘啦⋯明明頭先仲見到佢whatsapp最後上線係一分鐘之前⋯死啦我係咪嚇親佢呀⋯收唔收返個message好呢⋯

黑澤嘅心境每日都只會因為安達而有起伏。黑澤話唒都A⋯唔知幾多，佢從來都冇數過自己拖過幾多條女。因為次次都係佢地自己痴埋黎，黑澤覺得幾靚女性格又唔係好閪就會落搭。反正拍咗一排啲女就會話自己好假，講咩自己根本都唔係愛佢地，然後好快就講分手。黑澤到而家都唔知問題出咗係邊到。總之就係拍過咁多次拖，暗戀人真係第一次。黑澤成個人勁panic，完全唔知點溝安達好。

不如約佢出嚟食飯happy下先？由朋友做起應該就冇咁kam。

7。
正所謂心動不如行動。第二晚，黑澤就Book咗一間中環高級甜品鋪，有得係你面前炒雪糕個啲，又有得飲酒。所以佢就打算約安達Chill下，維持下段朋友關係咁。

於是黑澤有啲緊張咁打咗比安達。
「喂？安達？你放工未啊？係邊吖？」
「放咗啦，返咗深水埗啦喎」
「你想唔想食糖水啊？」
「咦Okay喎，你都想食啊？不如食松記？係我屋企樓下喳！夠方便！」

WHAT!黑澤都未講自己其實book左枱，安達就直接約咗佢係松記等，完全唔比機會佢邀請。算啦不過好小事者，松記咪松記囉，只要有得見安達，去邊都無所謂。黑澤拿拿聲上返自己架Benz就直飛去深水埗。

「呢邊呀！黑澤！我見到你架車啦！」
完全唔知松記係邊，黑澤唯有打俾安達求救。聽到呢把軟萌嘅聲音，黑澤搖低個車窗，就見到個著住白T踢拖嘅安達，成個中學生咁。真係好癲、黑澤竟然覺得呢個清純無害look好啱佢。

「安達～～我都見到你啦！點啊附近有冇停車場呀？」
「冇㗎你泊街啦！冇事㗎呢個鐘數冇人抄㗎！」

仲以為有得泊室內停車場嘅黑澤呆左。佢真係好少會去深水埗⋯嚟都嚟咗，佢快快手就泊左去安達指比佢個個位。

好彩唔駛等好耐，佢地好快就坐低左。
「霞姐唔該照舊吖」
「ok～嘩今日帶個靚仔黎？溝唔成女開始溝仔啦？」
望住安達同啲姐姐咁熟，黑澤覺得自己有少少融入唔到，不過安達都好好人，冇冷落到佢。
「哈哈唔好講笑啦，佢係我新朋友啊」

最後黑澤落咗一碗紅豆沙，安達就要咗碗芝麻糊。

「黑澤你有冇打mon hun㗎？」
正當黑澤偷偷地欣賞緊安達可愛嘅食相，安達竟然同佢講嘢。

「mon hun? 咩嚟㗎？」
「monster hunter喎？」
「我⋯我冇聽過添⋯」
「喔⋯」
呢個大概係安達仆心仆命諗出嚟嘅話題，但係黑澤竟然話冇聽過，佢又唔知點應了。唯有乖乖地收皮食糖水。

黑澤都覺得自己好失策。竟然接唔到安達嘅話題！屌！今晚返去要即刻買黎玩！

「咁⋯你有冇聽過三國演義啊？」
「呢個我有啊！」安達又講野啦！今次講中史？中唒黑澤個範、話唒佢以前都係讀中史嘅。
「以前我成日當中史係故仔咁聽，個啲咩春秋戰國啊，孫子兵法嗰啲，我好熟㗎！」

點知安達閘住左黑澤個話題。

「um..唔係唔係⋯我係問你有冇聽過連登個首三國演義⋯」
「咦⋯點唱㗎？可能我聽過但係唔記得咗」

安達飲咗啖水，清左清喉嚨，孔埋去黑澤個耳仔邊。

「呢首呢⋯ 岳飛可終身美麗～曹植得勾勾手指發誓～伯約不止感激敬禮～拜祭公瑾才是虛偽～月英多一分秀麗～曹孟德分享我的一切～」

黑澤爭少少就噴左口個啖紅豆沙出嚟。先唔講啲歌詞太鳩，安達孔到自己咁埋⋯連佢唱歌個啲氣息都feel到⋯今舖真係大檸樂⋯仲有⋯安達唱歌好可愛啊啊啊好想錄低⋯

「喔～～好似有聽過下！」
「真係㗎!!!」終於搵到共同話題啦！安達啲自信心返晒黎，完全打開晒自己嘅話夾子。

「咁你有冇聽過黃色衫綠色衫？」
「umm呢個好似冇」
「咁西佰利亞人呢？」
「都冇添」
「咁屎係黃色架呢？」
「冇喎⋯」
黑澤都係第一次安達咁high，佢自己都好開心。係袋到拎咗個airpod出嚟，分左一隻俾安達。

「不如⋯你而家search啲歌，我地一齊聽？」

就係咁，佢哋一人一隻airpod，係人地間糖水舖起勢咁聽，笑咗成晚。

TBC